Forums of Graduates and Students of Electronics Department at SUST


"" اللهم اغفر لى ولوالدى وللمؤمنين والمؤمنات والمسلمين والمسلمات الاحياء منهم والاموات ""




Forums of Graduates and Students of Electronics Department at SUST

منتدى خريجي وطلاب هندسة الإلكترونيات جامعة السودان للعلوم والتكنولوجيا
 
الرئيسيةس .و .جبحـثالأعضاءالمجموعاتالتسجيلدخول
دخول
اسم العضو:
كلمة السر:
ادخلني بشكل آلي عند زيارتي مرة اخرى: 
:: لقد نسيت كلمة السر
الساعة الآن
المواضيع الأخيرة
القرآن الكريم على الإنترنت
المتصفحون الآن
تسجيل صفحاتك المفضلة في مواقع خارجية
تسجيل صفحاتك المفضلة في مواقع خارجية delicious  تسجيل صفحاتك المفضلة في مواقع خارجية reddit  تسجيل صفحاتك المفضلة في مواقع خارجية stumbleupon  تسجيل صفحاتك المفضلة في مواقع خارجية slashdot  تسجيل صفحاتك المفضلة في مواقع خارجية yahoo  تسجيل صفحاتك المفضلة في مواقع خارجية google  تسجيل صفحاتك المفضلة في مواقع خارجية blogmarks  تسجيل صفحاتك المفضلة في مواقع خارجية live      

قم بحفض و مشاطرة الرابط Forums of Graduates and Students of Electronics Department at SUST على موقع حفض الصفحات

شاطر | 
 

 قصة الحرامي

اذهب الى الأسفل 
كاتب الموضوعرسالة
بنت ملوك النيل
مهندس جديد
مهندس جديد


عدد الرسائل : 11
تاريخ التسجيل : 12/10/2008

مُساهمةموضوع: قصة الحرامي   الثلاثاء 21 أكتوبر 2008, 7:29 pm

حبوبتي قالت لي يا ولد . . الحرامية ديل خوافين . . كان شفت ليك حرامي . . أعطس . . و فرفر و اتمغى فوق سريرك . . و كان لقيت ليك طريقة تتشهّق . . اتشهّق بي
راحتك . . الحرامي بقول الزول دا صاحي و بقوم جاري منك صوف . . بس أوعك تسرخ يا
ولد . . كان سرخت الله قال بي قولك . . المرة الجاية بجيك و يكتفك فوق سريك
. .
و لسانك دا يسلو ليك من لغلوغو . . كلام حبوبتي دا كيفني و بسطني طب . . و شحدت
الله يقوم يجينا حرامي عشان أفرفر و اتمغى ليهو و اتشهّق أمامه فارداً خشمي على
أوسع أبوابه . . و أشوفو و هو قايم صوف قدام عيوني . . داك الليلة راقد جمب
حبوبتي . . صحيت باليل . . علي صوت كلب ينبح . . قلت أمشي اطرد الداهية دا و
انحلا منو قبل يكتر النبيح و يعمل لي غلبة . . و اجي اتم نومتي اللذيذونية دي
بي راحتي . . الساعة الداير أقوم فيها أمشي انهر الكلب . . أشوف بي رقراق
البطانية . . دهمة شيء مكومة فوق راس الحيطة و قاعدة تعاين لي بي فوق الحيطة
.
.
في اللوال كضبت روحي . . قلت أنا قطع شك وهمان ساكت . . عيلا وكتين عركت
عويناتي . . الدهمة الفوق الحيطة دي بقت لي كبيرة . . دهمة حرامي . . المطرة
صبت فوقي من الخوفة . . و جسمي اتماص كلو كلو بقة زي العجين . . و عرقت من صوف
راسي لي كرعي . . و فكرة مشي طردالكلب طارت لي فوق راسي . . قلت خلاس دا حرامي

. .
جاء يسرقنا و يبشتنا . . قهرتك بي سيدي الحسن . . لبدت و قطعت الحركة و
اتكومتا في نص العنقريب . . و أنا أرجف من الحمى . . و قعدت أعاين للحرامي دا
بي رقراق البطانية . . يا السييييد الحسن الليلة تحلني من الورطة دي . . اظكرت
كلام حبوبتي . . و شحدت الله الحرامي دا يكون ذي حرامي حبوبتي الخواف . . و
اتظكرتا و صيتها و قلت لازمن أفرفر و أعطس و اتمغى . . عشان أوري الحرامي دا
أني صاحي . . شلت جسمي فووووق . . و هردلب رميتو في بطن العنقريب . . و قمت
اتشهقت و اتنخمت و تف بزقت . . لكن انت يا الحرامي أبيت تمشي من فوق للحيطة
. .
حرامي عنيد و عينو قوية ينغرز فيها عود كبريت . . حرامية الزمن دا ما زي حرامية
زمن حبوبتي . . منهم جفلة . . وكتي الانقلبتا فيهو و اتنخمت و بزقت . . التقول
عرفني صاحي . . الحرامي دا قبل يمين و قبل شمال . . و قعد يأشر . . بعد شوية
ظهر معاهو رفيقو . . بقوا اتنين . . دهمتين فوق الحيطة . . الدهمة قدر ركيزة
الباب . . الفيني كملت طب . . و من الخوفة لامن غمرت. . و قلت الحرامي البجيب
زميلو دا عيلا ناوي علي شر . . محاسن جارتنا . . داك الليلة الحرامية جوها
لقوها نايمة . . سمعت الكركبة . . صحت من النوم . . قالت ليهم سجمي انتو حرامية
؟؟؟ . . قالوا ليها آآآآآآي . . قالت ليهم زحوا لي كدي خلوني النسرخ . . الساعة
الدايرة تسرخ فيها الحراااامي . . الحرامية ديل مسكوها من عراقيب كرعيها . . و
اتشلبوها . . و فنننننننن فنوها بي فوق الحيطة. . الليلة الله يكفينا شر
الحرامية البجدعوا الناس بي فوق الحيطة . . أنا ضعيفوني . . و ما فيني حيل
. .
كان جدعوني بي فوق الحيطة عيلا أموت ليهن و أبقى ليهن في رقبتن . . الحويج سيد
البقالة الحرامية زمان جو يسرقوا بيتو . . وكت ما لقوا عندو شيء يسرقوهوا
. .
اتصرفوا بدل يرجعو ايد وراء و ايد قدام . . مسكوه وادوه كم عكاكيز فوق ضهرو
. .
و رجعوا صادين . . شاحدك و ناضرك يا مالك روحي . . الحرامية ديل كان تلبوا
الحيطة دي يبقوا زي الحرامية الجو للحويج سيد البقالة . . يدخلوا و يعملوا
العملوهو في ضهر الحويج ويرجعوا صادين بي دربهم . . عافي ليهن عفو الله و
الرسول . . أحسن من يفنوني بي فوق الحيطة و أموت ليهن في يدهن . . وكت الحرامية
ديل أبو يخافوا و أبو يزحوا من الحيطة . . قررت أقوم أنقلب و اتمغى و أعطس و
انكرش ليهم مرة تاني . . يمكن المرة الفاتت دي ما شافوني . . لكن وكت اتمغيت و
انكرشت و قحقحتا للمرة التانية . . انتو يا الحرامية قوموا و قبلوا يمين و
قبلوا شمال و أقعدوا أشروا . . جاهم واحد تالت . . بقوا تلاتة . . نعلت اليوم
الخالاني أسمع فيهو كلام حبوبتي . . و قلت كان اتمغيت و انكرشت تاني . . الحيطة
دي حا تتملي حرامية . . كان من قبيل سرخت الحرااامي كان انحليت . . لكن هسي
السرخة كيفن بعد ما بقوا تلاتة . . و يمكن يكون في شيء تاني لابد تحت الحيطة
.
.
و حبوبتي الراقدة جمبي دي . . بتضحك علي . . و فضيحتي بتكون بي جلاجل . . في
النهاية قررت أن أسرخ و كان حبوبتي قالت لي سرخت لي شنو . . أقول ليها حلمان
.
.
و جاني أب كباس . . لملمت حيلي و قوتي و سرخت بي صوت مقروش . . الحرااااااامي

. .
حبوبتي صحت من نومها مخلوعة . . مالك يا فيفيد . . قعدت أأشر ليها للحرامية
فوق راس الحيطة . . قلت ليها . . الحرامية يا حبوبة . . قالت لي و هي تضحك بي
طول حسها . . انت و همان يا ولد ؟؟؟ . . ديل جدادات عشة أختي نايمات فوق راس
الحيطة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
tweety
مشرف
avatar

عدد الرسائل : 558
العمر : 33
تاريخ التسجيل : 10/06/2008

مُساهمةموضوع: رد: قصة الحرامي   الثلاثاء 21 أكتوبر 2008, 10:07 pm





بعد الجرسه والقحه دى كلها طلعو جدادات


_________________







الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
lolla abdrhman
مهندس جديد
مهندس جديد
avatar

عدد الرسائل : 8
تاريخ التسجيل : 07/03/2011

مُساهمةموضوع: رد: قصة الحرامي   الأربعاء 23 مارس 2011, 3:34 pm

والله لكن حبوبه عملتا فيهو
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصة الحرامي
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
Forums of Graduates and Students of Electronics Department at SUST :: المنتديات العامة :: استراحة المنتدى-
انتقل الى: